巴塞速食愛斯賓奴

猪拉多纳

繼國家打吡擊敗皇馬後，巴塞今晚西甲早場又要出戰同市打吡作客愛斯賓奴。雖有正選門將域陀華迪斯（VV）因傷提早收咧，反而畀到巴塞挽留VV嘅機會，並羅致到天才橫溢嘅「新莫迪歷」夏利洛域，加上小將基斯甸泰路初為人父，咁多好消息之下，必想盡快解決愛奴，為下周中歐聯大戰馬體會留吓力，斯維建議捧半場客勝。
有望留住域陀華迪斯

自從國家打吡作客4比3勇挫皇馬後，巴塞啲運開始返緊嚟，乘住皇馬周中輸畀西維爾，佢哋輕取切爾達得以升上次席，儘管正選門神域陀華迪斯勇戰整傷十字韌帶提早收咧，仲要長抖6個月，令原本季尾約滿堅決離隊嘅VV進退兩難，好難搵到新東家，巴塞打算向佢雪中送炭傾續約，希望VV回心轉意。除此之外，巴塞正式宣布以220萬歐元（約2350萬港元）簽入克羅地亞新星夏利洛域，由於呢位細細粒嘅17歲少年，既係左腳球員又腳法秀麗，加埋一頭金髮，被喻為「新莫迪歷」，將來有機會與皇馬嘅師兄莫迪歷正面交鋒。

巴塞近年刮起一股生B熱潮，繼賓度、美斯、碧基、法比加斯、佩奧爾後，連小將基斯甸泰路都榮升爸爸，其老婆剛為佢生咗個囡囡Carlota，相信泰路做咗老竇一定更加生性踢好波。由於巴塞嚟緊周中要踢歐聯，主帥馬天奴當然希望今仗作客愛斯賓奴速戰速決。
now 632 周六晚11時直播