北京晒冷強攻水手

猪拉多纳

亞冠盃F組形勢緊湊，榜首同榜尾只有2分之差，今輪一哥FC北京(北京國安)作客對榜尾中岸水手，北京名帥文沙奴帶齊四大外援出戰，話明以3分為目標，即使另一主力張呈棟要坐波監，仍然有力反客為主，讓平半照捧北京！

(now 671周二下午4時30分直播)

北京今屆改由前馬體會教頭文沙奴領軍，幕後人野心極大，不單想於中超爭取佳績，仲有心喺亞洲舞台揚威。大軍上次主場對中岸水手，雖然缺少進攻重心祖菲古朗，仍能成功擊敗對手，今次呢位厄瓜多爾球星強勢復出，尼日利亞前鋒烏達卡肯定會獲得更多供應，加埋克羅地亞猛將高馬迪同南韓球星河大成撐起中場，四大天王齊晒人！

北京上場聯賽因為爭議球輸波，主帥文沙奴唔想回望過去，只希望亞冠盃球證判決會更公平，同時講明今場會以3分為目標，即使進攻主力張呈棟停賽，都唔會打守勢波。水手分組賽三戰只於主場贏過廣島三箭，但對手當時剛開季及用咗唔少後備，作戰態度遠遠唔及北京咁認真，呢隊波踢法單調，睇怕今戰都係難望搶分，北京作客讓波照捧上盤。
貴州冇火反得過

同日H組賽事，中超最弱代表FC貴州（貴州人和）主場對南韓的蔚山現代，貴州分組賽三戰只入一球，進攻火力超級疲弱，而蔚山就係同組最強球隊，今場作客都要讓波，個盤超硬淨，一於捧客勝！

(now 670周二晚8時直播)