雷丁爭升班要贏特

猪拉多纳

英冠升班附加賽席位爭持最激烈，位列第八嘅雷丁今輪喺主場迎擊一哥李斯特城，客軍來季鐵定重返英超，近期開始着手組軍，班兵完全鬆晒，上輪大敗明顯係慶功後遺症，今次遇上鬥志鮮明嘅雷丁，預期又會出現唔少士哥，大盤捧得過！

（TVB302周二凌晨3時7分直播）

李斯特城完成升班任務後，全軍瘋狂慶祝，教頭皮雅臣份約去到季尾就結束，佢將會傾新約爭取較佳待遇，而王牌射手紐根特、翼鋒萊特戴亞及門神卡斯柏舒米高等人都就快約滿，皮雅臣話明想留住一班主將。班友狂歡過後，家陣又諗住份肥約，點會集中精神作戰吖，上次主場對白禮頓大敗絕非偶然。雷丁落後第六位白禮頓一分，仲有機會爭奪升班附加賽席位，實同對手死過，一於玩大盤啦！
祖記對烏甸再追「細」

同日意甲一哥祖雲達斯作客烏甸尼斯，祖記現時打少場甩開次席羅馬五分，佢哋季尾喺國內成日Hea住踢，對上八場聯賽七場開細盤，其中六場冇失波，守得好穩。祖記上仗聯賽主場對利禾奴早喺上半場已憑射手洛蘭迪梅開二度贏住兩粒，最後行行企企淨勝兩粒收工，呢次鬥烏甸預期都係冇乜士哥，要細盤！至於瑞典超卡爾馬主場對艾夫斯堡，兩軍開季頭兩場聯賽都大晒，入得失得，再追大盤！