多蒙特搶德盃勢兇夾「狼」

猪拉多纳

多蒙特4日內連挫皇馬同拜仁，氣勢一時無兩，佢哋今晚將會出戰德國盃4強，喺主場迎戰禾夫斯堡，為免今季四大皆空，「蜜蜂兵團」一定搏到盡！多蒙特讓一球，撐1.83倍嘅「讓球主勝」啦！

（無線翡翠台周三凌晨2:30直播）
禾夫斯堡正選門將打柴

上季多蒙特踢到曉飛，但今季就因為傷兵問題持續，搞到佢哋延續唔到上季嘅佳績。「蜜蜂兵團」喺聯賽畀拜仁拋甩幾條街，3月已經宣布無緣爭德甲冠軍，之後歐聯8強又畀皇馬踢出局，獎盃一隻唔見一隻，依家只係剩番德國盃爭吓，今場波又點到佢哋唔搏命先？

事實上，多蒙特雖然連環失盃，但佢哋喺歐聯次回合打到皇馬有氣冇碇抖，最後贏埋2:0，之後聯賽作客拜仁大勝3粒，個勢咁勁，區區禾夫斯堡又點頂得住「蜜蜂兵團」先？

尤其係禾夫斯堡近戰場場有失波，對上一次保住清白身嘅比賽，已經要數到2月初喇。最大鑊係「狼堡」個正選門將比拿利奧手指受傷唔出得，「豆腐防線」雪上加霜，今晚面對如狼似虎嘅多蒙特，準備定抬蛋都得咯！