里昂PSG「細」紀爭霸

猪拉多纳

法國聯賽盃決賽

里昂早前喺聯賽作客以1:0爆冷擊敗巴黎聖日耳門（PSG），今周兩軍喺法國聯賽盃決賽再鍊過。雖然上次對賽贏波，但里昂依然受到傷停問題煎熬，中場傷兵眾多令創造力減弱，對家PSG冇咗射手伊巴謙莫域後又死晒火，近兩戰都冇波入，既然呢場波係王者生死戰，預期里昂同PSG都會以穩行先，1.9倍嘅入球細博得過！

（TVB302周日凌晨3:00直播）
指揮官打晒柴里昂焗死守

里昂依家聯賽排喺第5，爭來屆歐聯入場券唔係咁樂觀，為免今季四大皆空，呢個聯賽盃對里昂嚟講真係好重要，唔到佢哋唔搏。

係，雖然佢哋喺上星期日，爆冷以1:0擊敗PSG，士氣爆晒燈，可惜呢班波最大鑊嘅地方係傷兵成籮，想贏多鋪怕且都有心無力。
PSG冇伊巴鋒力大跌Watt

睇番里昂嘅十字軍名單，中場線係超級重災區，古艾達科芬拿、哥古夫2名核心都打晒柴，創造力已經大減喇，最陰功係連頂上戥腳、上仗射入致勝球嘅小將佐敦費利，今戰又話要坐波監，指揮官買少見少，就算拿卡錫迪同巴菲迪比高美斯兩大射手可以上陣，但中場冇供應，想入波怕且好難咯，里昂自己知自己事，嚟到決賽呢啲重要關口，肯定會以守為攻。

對家PSG喺伊巴受傷後，入球能力真係直線下跌。前鋒卡雲尼前星期對蘭斯入咗一球後就死晒火，對車路士嘅歐聯8強次回合就因為佢「敗家」而出局！唔單止卡雲尼，另一件前鋒拿維斯又雪到硬晒，唔識入波，既然雙方鋒力都咁弱，呢個入球細真係博得過！