曼聯作客特醒 唔赦愛華頓

猪拉多纳

英超尾場「拖肥」愛華頓主場火併曼聯，後者主帥莫耶斯首度重返葛迪遜公園球場倒戈，唔好睇佢屢破恥辱紀錄，其實紅魔今季聯賽作客成績冠絕群雄，適逢愛華頓上周中踢多場補賽兼輸埋波，士氣及體力受損，讓唔起英超作客王，捧紅魔讓球客勝好路。

（now 621周日晚11時10分直播）

今季被傳奇領隊費格遜欽點接掌曼聯嘅莫耶斯，屢破恥辱紀錄，除季初社區盾外，4大錦標全部落空。不過曼聯亦非不無可取嘅，睇番佢哋今季聯賽作客表現係10勝3和4負，豪取33分位列英超第1，比榜首利物浦仲多2分，點解紅魔作客會仲犀利？皆因莫耶斯教慣中型班擅踢穩守突擊，但話晒係英超霸主，喺主場玩呢招會畀粉絲噓爆，而焗攻效果又差強人意；相反作客時紅魔可以放下身段打突擊，開正莫耶斯嗰瓣，成績自然掂檔啦！
莫耶斯為面子而戰

愛華頓今季喺領隊馬天尼斯改造下變身技術流，玩控球同主攻，令人耳目一新，依家仲有力衝擊前4，惜上周中補賽意外輸畀水晶宮，聯賽7連勝強勢斷纜，爭取來屆歐聯入場券主動權又被阿仙奴奪去，都咪話唔打擊士氣。

曼聯今仗有兩名前「拖肥」球星朗尼同費蘭尼復出，面對愛華頓主動進攻，啱晒佢哋打反擊，加上馬天尼斯賽暗寸莫耶斯冇料到，莫帥為保面子定必加多二錢肉緊，曼聯今場有得受讓真係好筍，讓球客勝咪錯過。