高手過招今仗等加時啦！

猪拉多纳

今屆歐聯4強次回合最強戲碼，拜仁返主場再鬥皇馬。雖然皇馬喺首回合贏一粒，但論表現拜仁絕對唔差，有人批評佢哋一味搓搓搓嘅踢法，唔及「銀河艦隊」一劍封喉嘅反擊嚟得直接，不過拜仁能夠喺巴拿貝球場搓到主隊陀陀擰，並多次製造殺機，只有全盛時期嘅巴塞先做得到，可見「外星仁」水準極高。睇番皇馬近23次作客嘅歐洲賽輸5仗，竟有4次係不敵德國球隊，最近一次就喺今屆8強敗走多蒙特，再一次證明德國係佢哋嘅凶地。
「外星仁」應可贏番粒

首回合皇馬贏在戰術執行得宜，預計今仗會繼續踢守勢波，不過佢哋唔係車路士式死守不出嘅「泊大巴」戰術，一有空間便會打反擊，所以其防線絕非密不透風。正所謂久守必失，只要拜仁繼續耐心地搓波，實搵到漏洞攻破皇馬城池。因此有地利嘅「外星仁」至少可贏番一粒，收復首回合失地，但畢竟高手過招，嚟到歐聯4強呢啲關鍵時刻，雙方一定會小心翼翼避免犯錯，細鬼認為今仗好大機會要踢加時，刺激到暈。