有飛到可建軍功

猪拉多纳

　　通常跑完大賽之後期賽事都海軍鬥水兵，但係呢鋪竟然唔係咁，隔晚一睇，八場谷草賽事幾乎場場搵到重心，有好幾匹大熱門獨贏賠率仲要唔夠2.5倍，谷草算少見，都係唔好拗頸要信。

　　另外，周某發現三匹隔晚墊底飛相當勁馬（見表），三駒之中，周某最睇好第六場「軍功」。呢匹馬向來有飛先好，今季三次跑入三甲，獨贏賠率都5.5至8倍呢個範圍，反而其餘六戰有10倍以上，就全部唔入前四名。呢次佢落番三班，出王牌兼配莫雷拉，賠率即刻由上仗40倍變成隔晚得8.5倍，相信臨場會再熱，睇葉楚航可唔可以靠佢贏番場啦。

　　騎師王方面，表面又係韋達、潘頓同莫雷拉三分天下，但係佢齊齊有3倍又有危險，反觀柏寶胯下惡馬多，有9倍抵博。