方嘉柏落雨收柴

猪拉多纳

　　受到跑馬地渠務工程嘅影響，馬會要提早交場畀政府，今季谷草賽事剩番六次咁大把，有谷中霸王之稱嘅方嘉柏，當然要把握機會，落雨收柴，執得幾多得幾多。

　　今季截止目前為止，方仔谷中贏馬次數係眾練馬師之冠，亦係暫時唯一一位贏多過20W，由此可知，佢喺谷草啲攻勢真係好堅，而撞啱近月佢頻頻在主場攞分成功，呢期出馬多達12匹，咁多兵馬一次過湧到嚟谷草，呢一晚方家軍仲唔係想做世界！

　　奧妙繽紛夾慣潘頓

　　席上揀珍，求穩陣嘅梗係有賽績支持嗰堆，好似第五場「奧妙繽紛」及第八場「城中話題」，勝在路有專長，兩匹馬亦同潘頓夾得好哋哋，係穩位望贏嘅對象。

　　如果想搵啲有賠率嘅馬，頭場「快樂時光」諗得過，係驚佢心律不正後復出，唔知跑得出幾多成水準啫，一旦養得番，佢在谷草一哩唔係冇實力。至於第三場「沙池王子」初出追勁超強，剷入大冷P，呢類方廐PPG一出即嚇人一跳，前景多數美好。Jack