華倫折箭讓唔起西維爾

猪拉多纳

歐霸盃4強次回合續演「西甲內訌」！首回合淨吞兩蛋嘅華倫西亞，今晚雖然有主場優勢，弊在球隊歐霸盃首席射手柏高艾卡沙就黃牌上訴失敗，今場夠數要坐波監，鋒力大大削弱下，寧揀受讓嘅西維爾1.66倍「讓客」。

（有線62周五凌晨3:05直播）
柏高艾卡沙黃牌夠數停賽

華倫西亞中堅域陀雷斯同門將迪亞高艾維斯今場有望復出搏殺，防線穩健度當然提高，但首回合前鋒柏高艾卡沙被指衝撞西維爾門將比圖攞咗面黃牌，球會雖就此上訴，力證係比圖插水，可惜最終被歐洲足協駁回，柏高艾卡沙由於黃牌夠數，今場要停賽。「蝙蝠兵團」冇咗佢數胡，將大幅降低贏波翻盤機會。

西維爾日前喺聯賽作客畢爾包，丹尼爾卡列高報稱有傷，好在之後證實冇咩大礙，今場能夠繼續同麥比亞擔任雙防中做掃蕩工作，加上刑滿復出嘅右閘安度查喺邊路助攻助守，卡路士巴卡同拿傑迪錫一班進攻好手全部蓄勢待發，進取嘅話不妨直敲2.85倍客勝。