巴塞讓主打爆「基」

猪拉多纳

爭標未絕望搏盡大炒

今晚西甲巴塞隆拿主場迎戰基達菲，球員將會着住心口寫上「永恒的維蘭路華」嘅特別版波衫上陣，紀念呢位上星期去世嘅前教練。美斯等球員收拾悲痛心情後，今場為保一絲嘅爭標希望，點都要盡力爭勝，喺魯營迎戰實力麻麻嘅基達菲，係時候大勝一場，巴塞讓兩球，1.48倍「讓球主勝」係張峰心水之選。

（now632台周六晚10:00直播）
着紀念維帥波衫落場

巴塞依家爭標形勢極為被動，今季大有機會四大皆空，傳聞今夏清洗名單人數眾多，出得場嘅為自己一定搏命。今仗除尼馬、碧基同門將域陀華迪斯倦勤之外，美斯同恩尼斯達都可以上陣，前線鋒力有保證，加上法比加斯同阿歷斯山齊士每次後備登場都交到貨，要喺基達菲身上入波唔成問題。

基達菲聯賽排尾4，多尾3嘅艾美利亞兩分，護級形勢危危乎。基達菲自一月開始踢20場比賽只贏過兩場咁大把，球隊攻力一向唔夠銳利，今晚去到魯營面對巴塞咁多有質素嘅攻擊球員，唔會守得好耐。何況今季3次對巴塞加埋失咗11球，今晚難望有突破性表現咯。