皇龍寶駒侶讓路

猪拉多纳

　　苦戰至季尾階段，剛戰賀賢終於畢業，所謂一不離二，好事成雙，馬房先贏「金鑾大殿」，再來「格哥兒」捧皇太后紀念盃，真是威風八面。相對幾個身陷鬼門關的倉口，孫、李、胡、吳都算濕滯，尤其是李易達，由於上季已收警告信，萬一今季又未達標，便得執包袱講拜拜了。

　　達哥家中仔細老婆嫩，若然人到中年才失業，後果真不堪設想。有謂知恥近乎勇，明晚此倉出馬轉趨積極，共遣七駒參戰，大有漁翁撒網之勢，能否贏馬暫不知，然而第三場「春天」和第七場「皇龍寶駒」，兩駒不約而同強配貝湯美，此君勝在鬥志堅，騎驢都會砌盡，達哥食胡全靠佢矣！

　　先講「皇龍寶駒」，過往兩戰谷草1650米得冠季各一，路程正宗無疑問，今次更獲80分的侶「一見鍾情」讓路，搏殺決心昭然若揭，三甲穩如鐵塔！再講「春天」，近兩仗跑泥俱大敗，劣績不妨粉筆字抹去，皆因翻看牠季內八戰，明顯谷草1650米才是強項，於總場次270得第六，落後頭馬僅三乘許，今較當時低11分，足足半個班次，計死數已有力反彈。