超凡夢想熱身足夠

猪拉多纳

　　又係周末跑馬，阿棟向來小生怕怕，因為梗有啲場合爆到九唔搭八，不過，呢次可能有啲唔同，細看各場賽事形勢，畀我嘅感覺係有唔少重心馬在其中，當然啦，我亦有可能估錯形勢，另一變數係個天，如果落住雨跑，梗係小注為妙。

　　第一場四班1200米草地。「超凡夢想」擺明未成熟，日後成就唔會差，二班見面冇問題。依家係蝦佢進度唔多夠，一時間在四班先至會畀對手「恰」到。

　　照我估計，呢匹馬跑完一場熱身賽，成熟程度稍為比上場好少少，根本已經夠爭，再加上，配備有變動，加脷帶幫助操控，成績可望更進一步。

　　第三場四班1200米泥地。「紅褲仔」係肥佬森旗下有用兵力之一，季尾必然會繼續重視。踏入季尾嘞，亦唔到佢唔急，手上得9W，距離「家鄉」仲有好遠路，再唔發力，後果自負。

　　而講番隻馬實力，前仗仲跑得好好哋，上次跑到一戙都冇，演出反覆到冇人信，但就係因為咁，收到退熱之效，呢場郁手正合時宜。

　　第十場三班1400米草地。唔知今季最後勝利係咪屬於蔡約翰，只知今日呢個倉必有動靜，一隻又一隻好馬列隊出嚟，點會唔大舉出擊，「魚躍鳥飛」當然係其中1匹。

　　魚躍鳥飛仗比仗好

　　呢匹「魚躍鳥飛」已上陣3次，成績1場好過1場，證明到阿蔡都好想幫隻馬快啲贏番場，又難得雷神未灰心，搏輸幾場都肯再騎，騎練一條心交代，鬥志可取。陳華棟 資深評馬人