莫迪維京搏錘開入球騷

猪拉多纳

睇波梗係最想場波入多啲波，如果球隊全民皆兵嘅話仲過癮，皆因個個都有機會開火，試問對手可以守得邊個？今晚挪超就有兩支「全武行」球隊交鋒，莫迪主場對維京，1.62倍入球大唔好錯過。

（開賽時間：周三凌晨0:00）

話佢哋「全武行」，唔係指佢哋鍾意打交，係因為兩隊齊齊連續9場比賽有波入，最重要係雙方都唔係單憑個別球員「士哥」，大把人曉射爆對方大門。好似維京就有7位球員喺聯賽建功，雖然翼鋒迪蘭尼腹股溝受傷未必踢得，但射手保華臣重返大軍，火力依舊強大。

莫迪今季雖然冇咗前主帥蘇斯克查領軍，不過佢已經幫球隊確立進攻風格，新教練史古隆特亦樂得跟從，令莫迪暫時以9仗入21球，成為聯賽入波王。睇番班波開季至今就有成10個人開咗齋，一對箭頭古白蘭辛、穆罕默艾爾尤諾斯更各自喺聯賽轟入5球，雖另一前鋒施古達臣上仗先至傷愈復出，經過上輪聯賽後佢嘅狀態肯定有所提升，話唔埋隨時領銜主演呢場「入球騷」。