方程式順開唔停

猪拉多纳

　　今晚8場谷草賽事，好難避免地濕濕，執筆之時，個天好似想塌下來，雨勢又大又密，如果今日唔係及時放晴，場地唔慢就有鬼。如果場地真係黏軟，梗係咪亂，細細玩就算，搏命都唔會搵呢類天雨路滑之夜啦，對不對？！

　　第三場三班1650米。季初「智高星」分別在二班田草及泥地上名，事後睇番，都係符碌之作居多，因為呢匹馬長久以來，三班先至搵到食。

　　話說此駒上完兩次名，一路係咁輸，輸到前一場，終於回降三班，名次即刻提升，而上場跑番谷草一哩，成績又再好啲，反映到呢匹馬已經喺龍門口。難得韋達再騎，配搭畀到人信心，半冷佳選。

　　連捷不負所望

　　第七場二班1800米。「方程式」連贏兩場阿棟都有貼，唔係想認屎認屁，只係想帶出呢匹馬一直深得我心，而演出亦冇令我失望。

　　今次佢升班而戰，1800米未跑過，得唔得？真係冇譜，一旦應付唔嚟，輸到冇影，有咩咁奇，但諗深一層，方仔呢排旺過旺角，點石成金例子多得很，呢匹馬又贏開，冇理由會立壞心腸。

　　第八場三班1200米。「威威寶貝」演出真可謂準到加零一，點可能唔讚吓阿威，搞得呢匹馬頭頭是道。雖然，今季已經贏咗3W，應該已收夠籌，亦有謂花無百日紅，準極都會有死火一日，但係隻馬咁準，又識跑變化地，有便宜邊使洗頸呀，實會搏埋今場。陳華棟 資深評馬人