贏波賀新帥上任 維多利亞主勝「尼」料

猪拉多纳

維多利亞個主場被徵用做世盃訓練基地，聽朝巴甲硬撼明尼路要移師祖亞達公主球場進行，變相冇咗主場優勢，但佢哋今場有箭頭洛迪高蘇沙同甸尼爾強勢復出，加上新帥達維迪上任提振士氣，面對後防穿窿嘅明尼路點會失威？2.35倍主勝捧得過。

（開賽時間：周五早上8:00）
明尼路防線瓦解

維多利亞教頭利尼法蘭高上星期離任後，球會日前落實搵嚟達維迪接掌帥印，雖則佢今場仲未正式領軍，繼續由臨時教練卡路士阿馬迪奧帶隊，但呢名少帥職業生涯踢過山度士同哥連泰斯等巴西勁旅之外，又曾經外流士砵亭同費倫巴治搵食，淨係個朵都已經壓到場，而佢日前親到訓練場督操，更加畀到球員唔少信心。

得到新帥達維迪穩定軍心嘅維多利亞，箭頭洛迪高蘇沙坐完波監，球隊上季首席射手甸尼爾亦克服腳踝傷患並全面復操，今場兩人如箭在弦，進攻火力夠晒保證。更何況對手明尼路防線鐵三角全面瓦解，中堅奧達文迪要返阿根廷國家隊報到；另一中堅李安納度施華同門將域陀李安度儲夠黃牌要停賽，維多利亞要贏波賀達維迪上任，可以話依絲執啦。