納帕二號輪到坐正

不死鸟

今日我鍾意尾場蔡約翰馬房隻「大勝福星」，上場響千二米贏得好輕鬆，呢隻馬質素一啲都唔簡單，早兩日同馬主鞠博士食飯，佢亦叫我一齊入場打氣，相信今次增程跑千四米應該可以再下一城。

        另一匹心水馬係第二場「納帕二號」，上仗初出正係輸畀「大勝福星」跑第三，今次強手遠去加上馬有進步，仍留響四班作賽可出頭。

煇煌駒泥地一哩醒　　

        今日我推介第四場告東尼馬房隻「煇煌駒」，其實呢隻馬跑泥地一哩向來好準，過往七戰獲一勝三位，以一匹低班馬嚟講相當難得，今次用番贏馬拍檔徐君禮操刀，應該可以贏番一仗。配腳方面，「大唐勇將」響五班點都有多少着數﹔「乘風破浪」初戴眼罩咪睇小。

藍天增程收復失地　　

        今日我推介第十場「藍天」，上仗跑千四米僅以鼻位輸畀「川滙主帥」，已證明沙田一樣啱跑，今次增程跑千六米應該更啱，有權贏番一仗。對手方面，「家家寶」跑法夠機動，近期演出亦準，一定要拖﹔「色彩傳奇」卡士高，跑番讓磅賽會有唔同演出，宜兼顧。