鋤強扶弱撐馬體會

猪拉多纳

歐聯決賽皇馬鬥馬體會，講往績、星味、技術，皇馬贏晒，不過要留意「銀河艦隊」已經失落西甲錦標，如果冇埋歐聯，實在難以向球迷交代，壓力肯定大。相比之下，馬體會球星欠奉，但比賽態度好，踢法硬淨，想擊敗佢哋絕對唔容易。馬體會被睇淡之下，判輸來打，隨時會有更佳發揮，受讓平半，度士要下盤。
捧盃交代 皇馬壓力大

度士好鍾意馬體會，欣賞佢哋鬥志好，往往波到人到，表現實而不華。呢類球隊拚勁十足，憑一人走多一步，彌補本身技術不足，所以防線好少會露出破綻，想攻破佢哋大門談何容易。馬體會今屆歐聯12戰保持不敗，就係最佳證明。踢盃賽防守行先，主帥施蒙尼採取穩健戰術，絕對明智。

皇馬利用C朗同加里夫巴利嘅速度，以快打慢恰死拜仁慕尼黑，但面對馬體會緊密防守，肯定冇咁多空位畀佢哋快放。今場大戰90分鐘似和波格，受讓一方有着數，度士鋤強扶弱，希望馬體會可以直接贏波捧盃。