尊皇速龍惡氣十足

猪拉多纳

　　第二場第五班1200米，「尊皇速龍」應是最突出一駒，大前仗尚於四班同程得第四，負於頭馬「華麗登場」四乘多，而其蹄下敗將中，「銀飛龍」及「伽楠」之後相繼勝出，另有多駒再出上名，足證賽事水準不差。上場初落五班形勢本佔優，奈何抽14檔兼沿途四叠推進，但蝕盡下仍只負一乘多獲殿軍，反映居五班惡氣十足。今次等番田草1200米先出，有運抽埋二檔好位起步，對手實力又減弱，贏面甚大。

　　至於四匹降班馬亦要睇實，其中「悅欣賞」季內曾經於一場強組四班1400米入位，之後不進反退，可能有心部署減分落班才郁手；上周跑完獲減兩分後即匆匆出戰今場，改配韋達食指已動。冷門推介「豐華盛甲」，上季仍於三班賽入位，若非健康曾出問題，絕不會淪落至五班，埋門試閘不差，隨時殺入一席。

　　第三場第四班1200米，「金鹿」上季於新馬賽擊退「控制者」及「風雷」兩匹季內已勝之馬，質素應不差。近仗在三班屢遇強手未敢硬拼，今仗可落四班即見工夫加強，埋門大細閘做齊，初配潘頓更是首次由外籍大師傅執韁，已擺明車馬求勝，必然首選。

　　「心花怒放」上仗同程初佩眼罩即有進步表現，放至臨門才僅以鼻位屈居第二，運氣不及對手矣。今次續排內檔好跑，未交代馬苗禮德亦心急求勝，一定盡拼。(耀鈞)