墨西哥借以立威

猪拉多纳

主帥口出狂言唔衰得

身處世盃A組嘅墨西哥明早將於主場同以色列進行拍跳，「仙人掌兵團」喺今個月初已落實23人世盃名單，依家領隊米基爾靴里拉同一班國腳只需要專心為世盃備戰，即使熱身賽都唔會揸流攤，對住喺國際賽愈踢愈沉嘅以色列，科娜一於捧讓球主勝﹗

（周四早上9時30分開賽）

相比起阿根廷、西班牙、荷蘭、哥倫比亞等國家，墨西哥一早喺今個月9號就公布巴西世盃23人大軍名單，當中有16位係「本地兵」，有7位係喺歐洲搵食嘅球星，當中最有名嘅曼聯前鋒「小豌豆」查維亞靴南迪斯梗係有入選，而35歲老將馬基斯更會出戰個人第4屆世界盃添！既然「仙人掌兵團」已經揀好晒23人名單，今場對以色列嘅熱身賽就唔係為咗揀蟀咁簡單，而係磨練球員之間嘅默契同適應「狂帥」米基爾靴里拉嘅532陣式，預計馬基斯、赫達靴里拉、奧利比柏拉達等主力都會披甲上陣。
以色列愈踢愈沉

墨西哥主帥米基爾靴里拉之所以被叫做「狂帥」，皆因佢曾講出「球隊目標係要打入世盃決賽」呢番豪言壯語，令人「當堂嚇一跳，然後得啖笑」，「狂帥」為咗證明自己唔係亂咁噏，今場世盃開打前嘅頭炮一定唔衰得，講戰意冇得踢世盃嘅以色列一定冇墨西哥咁強，呢隊波近期喺國際賽沉到爆，近六場不勝，世界排名愈跌愈低，世界最新排名跌到78，唔話佢係歐洲三流球隊都唔得，今場墨西哥讓球主勝捧得過！