德國出齊架生抽水

猪拉多纳

喀麥隆為錢爆內亂

德軍齊心搵喀麥隆試刀！今屆世盃熱門德國，今晚會喺主場迎戰喀麥隆。「日耳曼軍團」一眾傷兵陸續回歸，領隊勒夫仲大讚班手足士氣一流添。相反喀麥隆爆出內亂，班球員同足總傾唔掂獎金問題，部分人仲話打算罷踢，亂成咁點頂到德國進襲先？識揀梗係揀1.5倍「讓球主勝」啦！

（now632台周一凌晨2:30直播）
小豬 基迪拉 拿姆 傷愈或披甲

德國主力「小豬」舒韋恩史迪加、基迪拉同拿姆已經傷愈，有可能喺今晚披甲，人腳自然更加完整。或者大家擔心拜仁同多蒙特呢幾年喺德甲鬥到咁激，會唔會出現內訌先？勒夫拍晒心口叫班「德粉」放心，肯定唔會出事喎：「大家操練嗰陣都勁專注，隊內氣氛一流，我哋無論喺體能定戰術上都已經準備好！」。

事實上，德國真係球星如雲，預料中場奧斯爾、馬里奧葛斯、中堅梅迪薩卡會擔正搏殺，老將高路斯就會喺前面踢單箭頭，擺明出強陣試刀，夠炒起「立立亂」嘅喀麥隆有突啦！
唔滿意獎金太少 伊度奧煽動隊友罷踢

點解話喀麥隆「亂晒坑」？事關正當世盃列強專心備戰之際，偏偏呢支非洲雄師就爆出醜聞。當地傳媒《Le Jour》話依家喀麥隆班球員同足總嘈緊獎金問題，唔滿意世盃獎金每人得6.8萬歐元（約72萬港元），講明每人要有18.2萬歐元（約192萬港元）先肯搏命。

喀麥隆足總梗係唔會屈服啦，據講麻煩友伊度奧諗住發動部分球員搞罷踢，逼足總就範。雖然唔知會唔會成事，但就肯定隊內氣氛唔慌好囉！講班底，喀麥隆已經唔夠德國砌，家陣仲搞壇咁嘅嘢，今晚聽畀「日耳曼兵」大炒都得啦！
乜都玩錦囊：德國人腳「大」超班

德國人腳有幾勁相信大家都好清楚，領隊勒夫賽前講明會盡量用盡換人名額，落得場嘅球員都肯定想爭取好表現。剩係諗到馬高列奧斯、湯馬士梅拿、舒賀爾尼等星級戰將隨時後備落場搏殺，叫質素差一大截嘅喀麥隆點頂先？既然撐得日耳曼軍團炒起對手，就不妨追埋1.5倍入球大啦！
Data King：喀麥隆換帥後跌Watt

‧德國連續9場未輸過。

‧兩軍近3次交手，德國全勝兼零封對手。

‧喀麥隆由領隊芬克領軍後，11戰僅4勝。