筍盤益你:（斑尼）聖河轉場見真章

不死鸟

 賭馬唔可以忽略幕後作風，正所謂「江山易改，本性難移」，馬主都係人一個，如果本身唔鍾意贏熱門，做馬迷嘅千祈唔好拗頸。好似夏佳理議員名下馬，除咗合養嘅前馬王「翠河」外，其實唔少馬好少以熱門取勝，當然斑尼唔係話佢熱倒冷爆，但數據在前，有時候唔到你唔服。

        「聖河」由夏佳理同李國緯等馬主合養，今季首次上名係喺田草千二米，當時輸畀「帝聖名駒」、「十則圍之」跑第三，賠率有十四倍﹔接戰同程跑第二，落後頭馬「鳥語花香」個幾馬位，臨場亦有十一倍，相隔一仗後轉跑泥地，結果以八倍開齋。由於初跑泥地即以凌厲後勁贏馬，搞到近兩仗再戰泥地均被捧成兩倍大熱門，最終只能跑第六同七，表現認真令人失望。

        聽晚「聖河」出爭三戰全輸嘅谷草，加上轉由韋健仕執韁，估計臨場實有得分，既然呢匹馬可以同「鳥語花香」喺兩個馬位內分勝負，今次面對呢批對手冇理由唔夠跑，排六檔唔算輸蝕，小心殺個措手不及。

        足智彩方面，今日繼續上演亞洲聯賽冠軍盃嘅分組賽，睇番F組形勢，日本大阪飛腳五戰全勝，現有十五分已篤晉級八強，今次主場迎戰FC首爾，到底主隊會唔會放軟手腳﹖

        根據資料顯示，至今大阪飛腳喺五場分組賽入十六球之餘，最犀利係只失兩粒，就知實力大超班，而且今季亞洲聯賽冠軍盃有特別獎金，但凡由分組賽一直贏到入決賽嘅話，就會有一筆可觀嘅額外花紅。相反，FC首爾踢五場分組賽失咗十球，呢次作客攻力強勁嘅飛腳，睇怕都幾難守得住，推介主客和主勝。