成個月未發市霍利時夠鐘「開飯」

猪拉多纳

　　未達標馬房仲有4個，而排在尾五嘅霍利時，今季提早上岸，一早贏夠15W，唔使喺漩渦之中，不過，佢其實贏馬唔係多，跑咗咁多個月，只得16場頭馬，真係掹掹緊。

　　睇番佢過去幾個月成績，二月僅得1W、三月兩W、四月捧蛋，上個月只係喺十號贏到1場，換句話說，有1個月未發市，雖然話依家佢冇嘢好爭，都冇理由翹埋雙手等放暑期啩？！

　　今次沙田夜賽，霍廐陣容唔係曳，睇嚟會「開飯」，但係礙於馬房手風唔順，買佢啲馬真係要有好大勇氣，事前要抱住「得之我幸、失之我命」嘅心態，亦因此，注碼宜細不宜大。

　　金獅猛將狀態好轉

　　頭場「巴其利」，四班識贏，竟然淪落到五班，都唔知衰邊瓣，睇佢上次落班第一場，即刻跑到個第五，近況似乎有起色，期望成績可續有改善；第二場「金獅猛將」，今季成績平平，跑到上場先至上到名，如果狀態季尾好轉，呢場有贏面；第三場「甜哥兒」，場場強配，練馬師梗係想早日交代，再跑剛上名路程，實搏。（Jack）