啦啦隊幫到手 三位Girl有分加

猪拉多纳

由於烏拉圭、英格蘭同日本全部輸波，3位靚女都估唔中，好彩仲有啦啦隊幫手！全靠佢哋貼中哥倫比亞贏波，3位參賽者各加10分！現時形勢Cheronna吳嘉熙以30分領先，Heidi李靜儀同Anjaylia陳嘉寶得20分平頭第二，今日3場波由Heidi同Anjaylia先揀，Heidi估德國同葡萄牙打和，Anjaylia就支持美國可以擊敗加納，剩番場伊朗對尼日利亞畀Cheronna，佢同啦啦隊商量後，決定支持尼日利亞。

Heidi李靜儀：德國對葡萄牙，兩隊我都鍾意，德國隊好勁，又唔想C朗輸，我估分唔出勝負，一於揀和波。

Anjaylia陳嘉寶：加納同美國好有緣分，兩隊連續3屆世界盃相遇，上兩次都係加納贏，今次輪到美國贏喇啩。

啦啦隊Yanny：一於信尼日利亞。

Cheronna吳嘉熙：伊朗對尼日利亞呢場波有啲惡估，惟有聽啦啦隊姊妹們嘅貼士，貼超霸鷹尼日利亞贏啦。