見招拆招:（精叻仔）太平洋夾韋健仕

不死鸟

下周二馬會牌照小組即將開會，決定來季騎師陣容，近期唔少在續牌上未必成事嘅騎師，響陣上都決心甚大。

        好似周四夜賽咁，韋健仕策「年年開心」跑完第二，其後就替「馬主叻」打開勝門，響呢個關鍵時刻增添頭馬，無疑令到呢位澳洲騎師來季申請全季牌照嘅籌碼大增。

        又好似長期有七磅可減嘅魯柏軒咁，雖然一年冇幾多場頭馬贏，但周四出策全場最冷嘅「搏得威」亦跑獲亞軍，騎另一冷門「虎威將軍」亦跑獲殿軍，可謂鬥志如虹。今戰筆者決定繼續吼實呢兩位騎師，話唔定可以贏番多少使用。

        第三場五班千二米，「晨速」季內已經兩捷，仍留響五班上陣有着數，近仗一再響陣上走外叠，輸形勢下敗不作準，今仗抽到五檔兼用魯柏軒減磅，隨時可偷襲。

        第五場四班千六米，「太平洋」季內三捷都係由韋健仕經手，今仗響Ａ欄排十一檔毋須擔心直路受困，末段應可盡情施展其凌厲後勁，坐位望贏可做到。