世界漫遊:（彼德）紅衣司令強項出擊

不死鸟

  今季備受傷患困擾嘅短途馬王「蓮華生輝」，臨近季尾終於回勇，早前響新加坡更力壓有星洲版「精英大師」之稱嘅「火箭人」，捧走KrisFlyer國際短途錦標，打破後駒嘅不敗之身。

        「蓮華生輝」遠征成功，賽後唔少馬迷都覺得應該乘勝追擊，出戰下月響英國舉行嘅一系列短途大賽。筆者對此只係持中立意見，無疑此駒若重踏當年「好望角」嘅舊路，確可提升香港賽馬嘅形象。不過，如果着眼於「錢」途，最理想嘅部署梗係等多幾個月，以出征日本短途馬錦標為目標，完成上年未圓嘅遠征夢先至係上策。一來呢場日本一級賽獎金豐厚，二來日本又較近香港，何必捨近取遠﹖

        「蓮華生輝」重振雄風，同場嘅澳洲馬王「兼併目標」就全程捱打，一代短途馬王畀「蓮華生輝」同「火箭人」呢兩匹流放海外嘅原住民蹂躪，澳洲人看在眼裏一定不是味兒。雖然「兼併目標」唔能夠成功衛冕，但係身兼練馬師同馬主嘅張奕，只係話今次只輸在場地太硬，遲吓去英國遇到偏黏場地，呢匹老馬肯定會有不同表現。

         講番聽日賽事，第七場千二米三級賽沙田銀瓶，筆者睇好蔡廐「紅衣司令」，對上四戰跑千四落敗，今仗回師八戰四捷嘅千二米，有力重開勝門。