世界漫遊:（彼德）白玉駿駒縮程可出頭

不死鸟

馬圈某程度屬代代相傳行業，所以不時出現父子同場較量、兄弟相爭場面，不過孖生兄弟一齊做騎師就唔係成日見到。近十幾年最出名係英國名將曉斯同侯理察兄弟，而今年初日本新一批見習生之中，亦出現一對孖生兄弟同時獲發牌，成為當地傳媒嘅花邊新聞。

        至於近日澳洲亦有另一對雙生兒出盡風頭，只得十八歲嘅孖生兄弟Nathan Berry同Tommy Berry，剛啱禮拜三齊齊響玫瑰崗馬場贏馬。遲十四分鐘出世嘅Tommy先於千一米賽事打響頭炮，而大佬Nathan亦唔執輸贏番場千三米，兩兄弟出道兩年幾以嚟，首次同日同場地勝出城市馬場頭馬，寫下當地賽馬史新一頁。

        玫瑰崗馬場首席受薪董事亦對呢對兄弟讚口不絕，大讚佢哋係專業、態度認真嘅後起之秀，仲話唔使幾耐兩人就可以獨當一面。

        響本地馬壇歷史悠久嘅摩氏家族，第二代掌舵人大摩今季暫響練馬師榜領先蔡約翰，睇嚟好大機會再做冠軍，以今日呢個倉嘅出馬陣容，若果空手而回嘅話，相信擁躉們一定唔收貨﹗

        第五場「飛躍星河」陣上一再接近，大摩接手後晨課表現判若兩駒，有權轉廐初出即省招牌。

        第九場「鎗臣」、「經典再現」一對各具優點，結合賠率後，較冷落嘅後駒更有捧場價值。尾場「白玉駿駒」前仗田草千二米後上不及跑第二，上回轉戰谷草一哩路長敗不足據，回師田草改爭千四米，可望打開在港勝門。