大戰數讀

猪拉多纳

2 今仗在累西腓嘅伯南布哥球場舉行，呢度今屆之前踢咗3場分組賽，當中中北美洲球隊喺度取得2勝，包括哥斯達黎加爆冷以1比0擊敗勁旅意大利，睇嚟呢個球場幾旺中北美洲球隊。

3 德國於之前嘅世盃決賽周曾兩度出戰美國，兩仗贏晒入3球冇失球，其中喺98年分組賽首輪，為德國埋齋射成2比0嘅球員，正係現任美國領隊「奇哥」奇連士文。

4 可能領隊奇連士文係德國人關係，今屆美國大軍名單中有4名球員喺德甲搵食，而上仗對葡萄牙為美軍扳平嘅中場悍將鍾斯，曾於08年入選過德國，並踢過3場熱身賽，因不受德國主帥勒夫重用，憤而「變節」。

6 德國（包括前西德）喺近6屆世盃分組賽最後一輪特別有計，唔單止豪取5勝1和佳績，並且攻入12球只失3球，其中近4次贏晒兼保持清白之身，表現夠晒Sharp醒。

7 美國連續7屆殺入決賽周，過去6屆佢哋曾經於法定時間內輸過12場波，而當中有10場係分組賽事。

12 德國有名你叫大賽專家，尤其踢世界盃戰績有保證，雖然冠軍次數唔夠巴西同意大利多，但打入4強嘅次數就無人能及，德國(包括前西德)歷屆共12次打入4強，包括冠軍3次(1954,74,90)、亞軍4次(1966,82,86,02)、季軍4次(1934,70,06,10)同殿軍1次(1958)。

102 今仗將會係德國於世盃決賽周嘅第102場賽事，之前101場「日耳曼兵團」取得61勝20和20負。