馬房秘聞:探子梁家俊望一切順利

不死鸟

 ▲「一切順利」今戰繼續交由梁家俊執韁，騎者自從哮喘發作而退下火線後，復出至今仍未贏過馬，師父蘇保羅吩咐梁家俊近日加強運動量，希望多做運動可以增強體質，令發病機會減少。而昨午蘇保羅更召咗梁家俊入馬房寫字樓，翻睇此駒近仗錄影帶，今戰唔搏就奇。

       ▲「剛剛好」今季九戰仍未贏馬，但其實馬匹健康正常，只係上季尾搏完之後未回到氣，所以今季初表現才欠佳。不過，呢匹馬到季尾狀態已回勇，由於今次有機會跑擅長嘅變化地，所以騎練都相當肉緊，噚日臨收操賴仔就親自替此駒踱步，其後吳定強亦急急腳去接馬，睇嚟今鋪必打硬仗。

        ▲「祥勝奇駒」馬主上周曾經入馬房探班，昨午亦再度入倉睇愛駒情況，獲悉呢匹老馬健康正常。今仗縮程跑一千米更合腳法，而文家良噚朝收操後，亦特別入倉摸此駒馬腳，確保腳患無復發，今仗值得留意。

        ▲方廐近期成績唔錯，聽晚亦繼續強陣出擊，其中幕後一向對「喜寶寶」睇得好高，希望來季可以參加打吡，一圓同主馬「喜聚寶」未能完成嘅打吡夢，馬房一致認定呢匹馬有長途氣量，所以今仗特別增程出擊，啱心水可捧場。