馬房秘聞（探子）摩廐將帥策動大反擊

不死鸟

▲大摩今季銳意爭冠軍，但剛戰方嘉柏中三元之後，現時只領先方廐六Ｗ，所以噚朝大摩都好積極督操，希望今戰可以贏多幾場頭馬。周日摩廐合共有十三駒報名上陣，可以話係大軍壓境，睇陣勢已經知道一定會搶攻。

　　噚朝大摩就安排「高鳴」、「海王子」、「心歡笑」、「桃李滿門」同「比翼雙飛」由白德民快跳﹔另外騎者替「爆冷」及「閒話一句」快跳之後，即前往烽火台與大摩密斟，最終騎者選擇替「閒話一句」操刀，似乎呢場遮打盃已經心中有馬。收操之後，大摩同白德民仲齊齊返馬房仄晒各駒食料，好明有心大舉出擊，值得吼實。

　　▲柏寶剛戰中三元兼做騎師王，昨晨呢位大紅人笑容滿面，首匹出操有賽程之馬為第十場「千杯不醉」，騎者替此駒快跳兩段後，即上烽火台搵伍碧權密斟，其後柏寶再替「寶貝」快跳兩段後，就向呂健威匯報此駒情況。賭馬最緊要跟紅頂白，呢兩隻柏寶坐騎可以捧場。

蔡明紹復出搏殺

　　▲蔡明紹墮馬後今戰終於復出，告仔唔敢令佢太勞累，噚朝只安排「萬子千紅」、「鐵哥們」及「威利多多」呢三匹有程馬畀佢試。操完之後，蔡明紹向告仔一一匯報馬匹情況，收操後更被召返馬房寫字樓，翻睇幾駒近仗的賽事錄影帶，其後仲同告仔齊齊返馬房仄各駒食料情況，睇嚟呢路人馬今戰必拼無疑。