世界漫遊:（彼德）家橋增程可施回馬槍

不死鸟

跑埋今次馬季得番八個賽日，冠軍騎練之爭各走極端，韋達再次篤定做冠軍，問題係頭馬可唔可以過百場﹔反觀練馬師方面，原本贏成條街嘅大摩，埋門畀蔡約翰同方嘉柏追到氣咳，依家只領先方廐六場，你都咪話唔驚，尤其方嘉柏近期氣勢如虹，跟紅頂白點都要揀選捧場，其中以第十場「極品絲綢」最具惡氣。

        呢匹新西蘭三歲自購馬在港三戰，分別跑千二至千六米，雖然仲未上名，但其實每仗都有啲進步，其中千四米配白德民一役，表面睇只得第六，但直路響馬林自動搵位衝上，顯示鬥心十足，既然當時狀態未足，亦只係輸畀「文武精英」、「玩具神話」及「賞惑」等三班惡馬一個馬位左右，反映絕非朽木。

        呢次係「極品絲綢」由沈集成馬房轉至方廐後嘅第一戰，但早前同樣由沈轉方廐嘅「武士神駒」，初出一役亦即有表現，咁計自然要對「極品絲綢」另眼相看，呢次安排韋達操刀擺明不容有失，有力贏馬省招牌，就算排外檔亦唔能夠睇小。

        至於廐侶「家橋」上仗初出跑直路賽，閘前落飛捧到得番九倍，點知全程冇段好睇，可能輸進度同路程唔啱，賽後操咗個幾月先再出，改爭更合腳法嘅千二米，退熱後有權施回馬槍。

        另外，出戰尾場二班千二米嘅「龍的風采」，呢隻五歲馬勝在有班底，今次加眼罩希望會帶嚟新鮮感，改配湯智傑只負一一七磅有利，跑出水準乃一路奇兵。