諾在其中:（馮諾嘉）比翼雙飛信心爆棚

不死鸟

 今日三T、第二口孖T同六寶獎都有多寶，其中以三T最吸引，馬會估計如十蚊一注中正獎可得三千三百萬，但三關都出足十四匹，而且每場又有唔少邊線分子，如果想中得巨獎，大家真係要畀足心機刨馬喇﹗

同心同德增程更合

        反而第二口孖T似乎較易揀馬，頭關第七場編為三班二千米，唔少參戰馬都係初跑同程，不過上仗喺千八米後追入位嘅「同心同德」，今次跑多二百米應仲啱，加上跑大長途排十四檔唔係咁大影響，值得做膽。至於尾關第八場一級賽二千四百米遮打盃，呢場只得八匹參戰馬，正所謂路遙知馬力，相信賽果會正路得多。呢類大長途賽事通常由高分馬壟斷賽果，所以「爆冷」、「包裝大師」、「自由好」同「閒話一句」應可控制大局。

        第九場三班千二米，「連利精英」季內三戰同程全勝，上仗入直路嗰陣仲差唔多包尾，結果後上甚勁贏對手四分三馬位，續配柏寶跑強項，連捷可期。「特好」、「星火燎原」近績好，「威力無窮」負磅輕有利，三駒均可作配。

         另一場心水係第十一場二班千二米，「比翼雙飛」上仗初出已有唔少票數支持，結果輸個半馬位得第三，早前小妹曾訪問馬主包大偉，佢話上次隻馬只得七成狀態，賽前諗住最多跑位置，但埋門馬匹狀態愈來愈弗，佢話有信心可以贏馬開齋。

        配腳先揀「牛精金星」，今季轉投賀廐後即連場入圍，上仗改用蔡明紹負磅輕飄飄，結果一放到底贏馬，重配柏寶威力更強，坐位望贏。「鼓浪天風」上仗同程後追甚勁跑第五，忠心馬時刻要防。至於「威利多多」在港唯一頭馬就喺同程取得，有一檔之利要吼實。