筍盤益你:（斑尼）人緣好馬可破數據

不死鸟

鄭俊偉馬房今季贏咗十二場，仲差一場頭馬就可以達到馬會發牌要求，為咗唔想季後要同馬會解釋，相信餘下賽期必會全力爭取頭馬，好似今期總共派出八駒應戰，幾乎已接近全倉兵力嘅三分一，咁大陣仗唔使問實會有馬出擊，不妨從中揀選捧場對象。

        「人緣好馬」上仗轉跑泥地千二米，終點前喺楊明綸胯下追過大熱門「萬能駒」，成功打開今季勝門，今仗增程跑泥地一六五○米，相信唔少人都會睇淡，除路程有疑點外，又因楊明綸停賽要改配梁家俊，加上今季鄭廐馬贏完再出未試過連捷，可謂集齊不利數據於一身﹗不過，睇番第六場對手陣容，好多都係喺四班賽得個近字，而擅跑泥地嘅「雙妙星」、「神殿」又抽外檔，所以抽得一檔起步嘅「人緣好馬」，形勢上唔多唔少都會有啲着數，兼且負磅僅比上仗多四磅，梁家俊騎功又唔差得過楊明綸，睇怕「人緣好馬」可以成為今季首匹鄭廐連捷馬。

         足智彩方面，今晚重心係希杭主場對維爾瓦呢場西甲賽事，由於主隊跟奧沙辛拿同得四十分排尾三、尾四，如果主隊唔好彩冇分，而奧沙辛拿有分落袋嘅話，咁希杭就要陪同紐文西亞、維爾瓦降班，可見主隊必定搏甩髀。

        既然希杭喺主場有一定攻擊力，而維爾瓦亦冇心理包袱，估計呢場隨時上演入球騷，一於博入球大。