熱刺燃起進攻火燄

猪拉多纳

普捷天奴激發高價雙箭

上季英超有幾大亮點，包括曼聯喺「足球天才」莫耶斯帶領下一直沉淪、利物浦大爆發險奪冠，以及熱刺用一個加里夫巴利換7個新兵，結果卻係換嚟慘淡成績，當中兩大貴價新兵拉美拿同蘇爾達杜嘅表現無愧水貨稱號，不過佢哋喺新帥普捷天奴領軍下睇嚟有鹹魚翻生嘅迹象，上場熱身賽合力炮製咗兩個入球，今場作客芝加哥火燄，有望大勝一場，大盤同讓球客勝都捧得過！

（now 621周日早上8時直播）

熱刺上季分別用3,000萬鎊（約3.9億港元）同2,600萬鎊（約3.4億港元）買入阿根廷翼鋒拉美拿同西班牙前鋒蘇爾達杜，但兩位喺熱刺嘅表現認真係「一流一」，前者傷多過踢，後者身為射手就淨係識射12碼，結果畀球迷恥笑無極限！

其實佢兩位之前喺意甲同西甲都踢到曉飛，嚟到英超，一來要適應呢度嘅足球風格，二來呢兩匹千里馬只係未遇上伯樂，熱刺上兩位領隊保亞斯同舒活都證明咗唔識用佢哋，依家到前修咸頓領隊普捷天奴上場，睇嚟拉美拿同蘇爾達杜終於都遇上佢哋嘅伯樂，均有復甦嘅迹象，上場對FC多倫多，拉美拿梅開二度，兩球都係由蘇爾達杜助攻，二人慢慢踢起信心同狀態，絕對係熱刺之福呀！今場嚟到芝加哥同剛剛慘敗喺聖荷西地震腳下嘅芝加哥火燄對戰，大盤同讓球客勝均可兼投。
串射肯薩斯哥倫布機員

講開美職球隊，阿King再講埋聽朝兩場美職賽事，先由FC多倫多主場迎戰肯薩斯體育會，FC多倫多有星級前鋒迪科爾停賽，實力受削，上季美職總冠軍肯薩斯體育會有望取勝。

（TVB 301周日早上7時直播）

另外一場就由新英倫革命主場對哥倫布機員，革命近六仗全敗，狀態跌至谷底，實在讓唔起機員，捧讓球客勝！