新生紅魔 乘勇屠狼

猪拉多纳

尹戈爾反轉美國第2擊！

嗜血「紅魔」強勢屠「雌狼」！國際冠軍盃A組周日凌晨於美國丹佛開戰，曼聯惡鬥羅馬。「紅魔」領隊尹戈爾，日前首次領軍即大勝洛杉磯銀河7:0，重點新援同新星都有料到，要擊敗前線啞火嘅羅馬話咁易，博曼聯2.18倍主W。

（有線61及201、中央5台周日凌晨4:10直播）

曼聯喺雪佛蘭盃同洛杉磯銀河較量，首度領軍嘅尹戈爾談笑用兵，埋單輕鬆炒對手7:0。雖然銀河實力較弱，「紅魔」大捷未必代表到啲咩，但絕對可以加強番班球員嘅信心。最重要係新援安達靴里拉同勞基梳爾勁搶眼，新星米高堅尼同里斯占士又有貨交，連之前畀莫耶斯搞到跌晒Watt嘅艾舒利楊格同香川仔都有料到，今場波繼續有佢哋候命，使乜驚劏唔穿羅馬條防線？
靴里拉 梳爾對辦

或者有球迷擔心，「紅魔」嘅美國掘金之旅賽程頻密，未必維持到場場都咁掂，就連尹戈爾都詐晒型，希望球會下季唔好再搞「呢啲嘢」，之不過，咪忘記尹戈爾調兵遣將有一手，今夏世盃帶荷蘭嗰陣，喺加時階段最後一刻換入門將告魯爾守12碼，固然令球迷印象難忘，世盃大軍名單上23位球員都用盡晒，至今亦為人津津樂道，所以頻密賽程對尹帥嚟講，根本唔係一個難題。
羅馬仲係靠托迪

另邊廂，羅馬喺出戰國際冠軍盃前，都搵咗與曼聯同屬英超嘅利物浦拍跳，最終靠前鋒波里路完場前絕殺以1:0贏波。其中前鋒安東里奧沙拿比亞、中場尼恩高蘭、右翼伊度比同左閘艾殊利高爾等新援都先後上陣，不過踢落略欠默契，而且中鋒位置，擔正搏殺嘅38歲老將托迪有經驗冇活力，後備落場嘅18歲小將安東里奧沙拿比亞就夠活力唔夠火候，今場對住當頭起嘅曼聯，好難唔輸喎！
Data King：曼聯對賽有優「細」

‧雙方近6次交手，曼聯取得4勝1和1負，當中4次開入球細。

‧曼聯王牌朗尼、翼鋒艾舒利楊格與後衞里斯占士上場齊齊梅開二度。