曼城二線兵KO利物浦

猪拉多纳

3場轟11球弗到爆

衞冕英超嘅曼城聽朝會喺國際冠軍盃，同利物浦喺紐約洋基球場再錬過，一場惡鬥在所難免。曼城依家雖然有成班正選仲休息緊，但一班副選近3場踢到識飛咁，合共轟入11球，士氣勁到爆。而今夏買咗唔少人嘅利物浦，成班波默契大不如前，踢得唔多順。就算今場曼城再用副將出戰，要KO「紅軍」不成問題，2倍主W博得過。

（有線61及201周四早上7:00直播）

曼城上場用班副將都大炒AC米蘭，雖然對手防守勁曳，但係「藍月亮」可以喺意甲褪色勁旅身上，取得5球真係勁到爆！雖然今場一眾世盃兵可能會繼續抖，但近兩場班「細嘅」踢得咁順，領隊比歷連尼可能會畀佢哋繼續踢。一班副選當中，以祖維迪表現最搶眼，呢位上季傷多過踢嘅黑山球員喺近幾場熱身賽，表現令人眼前一亮，領隊比歷連尼都大讚佢仲有大把料未騷出嚟。今場對住利物浦條後防線，可以當做一次試金石，畀比帥Check下祖維迪係咪真係有貨。
紅軍新兵多輸默契

另邊廂，「紅軍」今夏使咗唔少錢買人，其中一個重磅收購拉爾拉拿膝蓋受傷，要抖成6星期，趕唔到喺英超開鑼復出，不過唔使開刀算係不幸中嘅大幸。修咸頓中堅洛夫雲通過體測正式「入伍」，但係佢應該趕唔到喺今戰上陣。利記今夏確係買咗唔少人，依家雷米體測「肥佬」，仲可能要同熱刺「拗手瓜」，爭「修頓」前鋒積洛迪古斯。

不過，一班新兵啱啱加入，仲熟習緊領隊羅渣士嘅戰術，「紅軍」嘅默契點都差啲。睇番過去幾場波，利物浦踢落硬係差咁啲，冇咗上季嘅侵略性。由利華古遜加盟嘅安利簡恩，同佐敦軒達臣位置上重疊，令利記中場創造力大減，而另一新兵拿沙馬高域上場首戰表現又冇乜特別，睇嚟似係羅帥嘅「長遠發展項目」，今場唔好寄望佢咁多。曼城依家士氣如虹，利物浦一班球員又重新磨合緊，識揀嘅一定係揀當旺嘅曼城啦！