C朗搏殺 朗尼發力 皇馬曼聯豪門大戰

猪拉多纳

國冠盃A組最後一輪賽事，由曼聯同皇馬喺密西根球場上演巔峰對決！曼聯喺尹戈爾執教後唔再做「燒味師傅」一味斬斬斬，完全將桑馬達、安達靴里拉嘅能力發揮到極致，加埋朗尼要發力爭做隊長，今晚肯定當皇馬係殺父仇人咁喪射！不過「銀河艦隊」亦有C朗復出，兩軍擺明一副鬥攻駁火格，捧1.55倍入球大！

（有線61及201、中央5台周日凌晨4:00直播）

呢場世紀「大」戰吸引咗超過10萬名球迷買飛入場，預料全美最大嘅密西根球場到時會勁墟冚。榜首曼聯雖然唔輸都可以出線，但難得可以砌低皇馬省靚招牌，尹帥邊肯放過呢個咁好嘅機會先？何況有消息話曼聯啲老細講到明，今季入唔到前４就即死，尹戈爾點唔會唔打醒十二分精神吖。睇番呢位鐵腕教頭自上任後，成隊「紅魔」即時生晒，3戰不敗之餘更喪入10球，新兵安達靴里拉又極速融入球隊，有佢同桑馬達提供彈藥，前線唔愁冇「餐士」。
史高斯撐朗尼做大佬

「紅魔新大佬」一職至今仍然懸空，早前曾經傳出尹戈爾希望愛徒尹佩斯擔當重責，不過曼聯名宿史高斯，日前就開腔力撐朗尼先係做隊長嘅最適合人選。連大師兄都幫手造勢，相信「魔童」實會把握今次鬥皇馬嘅機會，盡情數胡去證明自己！
C朗倒戈例有士哥

至於堂堂歐聯冠軍皇馬，今夏遠赴美國諗住爭國冠盃，點知就喺小組2戰不勝包艇，真係講起都羞家！好彩，陣中超級王牌C朗早前終於復操，上仗亦有坐喺後備席，主帥安察洛堤仲親口話佢康復進度理想，有望喺今晚落場搏殺倒戈添！需知道呢位葡萄牙國腳實力鬥心兼備，就算熱身賽並一樣搏晒老命，而且「萬人迷」對曼聯特別醒神，上年歐聯兩鬥「紅魔」都入波，況且盛傳射手賓施馬續約在即，肯定刺激其他「士哥拿」交貨，今場豪門「大」戰，似乎無可避免喇！
Data King：兩軍對決旺開入球騷

‧雙方近6次交手，曼聯取得1勝2和3負，當中有4次開出入球大。

‧曼聯近3戰入10球。

‧皇馬喺國冠盃仲未贏過波。