戴拿模炒得起羅斯托夫

猪拉多纳

高薪鋒霸古蘭爾返晒嚟

俄超早場莫斯科戴拿模主場對羅斯托夫，戴拿模今夏大事擴軍，實力明顯高一線，佢哋近三季聯賽首度出師都吃悶棍，今晚主場面對陣容不整嘅羅斯托夫，教練卓治蘇夫聲言要打響頭炮，黑柴捧2.45倍讓球主勝。

（周日晚8時30分開賽）

今仗雖然係俄超首輪，但兩軍已經踢過一場正式賽事，戴拿模喺歐霸盃主場和以色列球會基爾史莫納夏普爾1比1，全場壓住對手狂攻，射門竟然達30次，但始終係今季第一場正式比賽，加上對手門將海莫夫表現太過神奇，最終贏唔到波，不過演出令人滿意。球隊今季豪花逾2,000萬歐元擴軍，新兵包括來自曼聯嘅荷蘭小將阿歷山大畢拿、古賓嘅保加利亞國腳曼奴列夫、標準列治嘅法國小國腳華恩基亞都有上陣，不過黑柴認為佢哋最大得着係高薪鋒霸古蘭爾終於回復健康，射入球隊唯一入球，呢位前德國國腳喺俄超大超班，上季因傷長抖只踢得7場，已經取得5個入球，有佢回歸，戴拿模嘅火力將大幅提升。
羅斯托夫陣容超殘

羅斯托夫喺俄超盃就以1比3不敵莫斯科中央陸軍，上季歷史性首次捧走俄羅斯盃本來係可喜可賀，不過足總認為佢哋球會資源唔足夠代表俄羅斯參加歐洲賽事，所以剝奪咗佢哋歐霸盃參賽資格，呢支小球會始終財力有限，上季光芒四射嘅安拿尼迪斯同迪斯尤巴都係莫斯科斯巴達借將，今季已經還番畀人，整體實力大幅削弱，今仗仲要殘陣出擊，前線主力「仁川朗拿度」柳秉秀同後衞伊哥盧奴因傷缺陣，中場古爾羅簡加停賽，作客面對夫添嘅戴拿模凶多吉少。