戴拿模開「羅」啅硬

猪拉多纳

大手買人 首戰開殺戒

莫斯科戴拿模自從喺1976年贏得第11次頂級聯賽冠軍後，已經有38年冇攞過聯賽冠軍。今季佢哋大手買入唔少球員，誓要一嘗俄超冠軍滋味，今晚主場出擊對住實力一般嘅羅斯托夫，誓要打響頭炮，2.45倍嘅「讓主」捧得過。

（開賽時間：周日晚8:30）

莫斯科戴拿模今季請咗卓舒索夫頂替辭任嘅彼得斯古，成為呢班波嘅新教頭。卓舒索夫之前帶阿馬卡同泰歷克都攞到非常唔錯嘅成績，領軍功力絕對唔嘢少。除咗新教頭之外，戴拿模會方今季亦不惜工本，重金禮聘馬賽嘅法國國腳「矮腳虎」華布拿、標準列治中場華恩基亞，同埋曼聯後衞阿歷山大畢拿過檔，配合原有嘅5名俄羅斯國腳同其他實力戰將，絕對有本錢一搔38年之癢，兼且問鼎球會史上首個俄超冠軍，即使華布拿尋日先到埗唔會踢，但係都夠料炒一場。
羅斯托夫用「次貨」冇得揮

至於佢哋開鑼戰嘅對手羅斯托夫，雖然上季以中型班姿態第7名衝線表現可人，不過為佢哋立下唔少汗馬功勞嘅射手迪斯尤巴，已經外借期滿返咗去莫斯科斯巴達，會方由辛尼特羅致嘅布卡洛夫，實力同迪斯尤巴冇得比，仲要向俄甲借件白俄後衞保達捷夫戥腳。羅斯托夫今季用「次貨」應難重溫上季舊夢，聯賽首戰對住戴拿模一班精兵，想攞分更加難過登天，一於捧主隊大勝攞頭彩啦！