巴塞唔齊腳難讓玻

猪拉多纳

尼馬養傷照蒲損球會形象

巴塞隆拿今晚將會喺日內瓦同拿玻里踢熱身賽，雖則响世界盃「斷背」嘅尼馬已經歸隊，仲有傳軍醫開咗綠燈可以復操，但係今場佢同其他「世盃兵」美斯同馬斯真蘭奴都唔會上陣。人腳唔齊嘅「地上最強」信唔過，呢場一於捧拿玻里2.25倍嘅「讓主」！(now632台周四凌晨2:00直播)
唔理會長喪插 照買直升機

世盃被撞到背傷骨折嘅尼馬，日前已經返到巴塞隆拿報到，西班牙傳媒仲話隊醫喺體測後，話佢可以按療程復操。雖然復出現曙光，但係「新比利」最近瘋狂開P，惹嚟巴塞會長巴度美奧不滿，話佢咁喪蒲會損害球會形象。尼馬被插都唔知衰，仲想買架私人飛機方便自己來往各地出席商業活動，不過可能因為要使一大筆錢，所以佢最後決定都係買架直升機。

「新比利」同剪咗新髮型嘅美斯、馬斯真蘭奴等世盃兵今場都冇隨軍去日內瓦，今季最大收購蘇亞雷斯正接受國際足協嘅4個月禁止參與任何足球活動處分，今場連入場做觀眾都唔得。雖然有傳「地上最強」想買哥倫比亞球星古達度，但係佢哋同費倫天拿仲未傾掂數，巴塞今場又有中場核心沙維因小腿有傷未能披甲，佢哋都係要靠恩尼斯達同新兵拿傑迪錫等人撐起頭家。
拿玻里借入米捷

至於巴塞對手拿玻里今夏冇乜動靜，只係由英超史雲斯借到前鋒米捷，中場悍將比哈美就被賣去德甲漢堡。雖然拿玻里冇咗呢位瑞士中場，但係佢另外兩位同鄉恩拿同迪斯馬利同樣咁硬淨，要應付唔齊人嘅巴塞冇難度，所以今場捧拿玻里點都着數啲。