PSG-1喪炸蘭斯

猪拉多纳

開鑼頭炮群星開火

新一季法甲開鑼，上季冠軍巴黎聖日耳門(PSG)衞冕第一擊作客鬥蘭斯，PSG今夏購入大衞雷斯、奧里亞兩名防守猛將，實力進一步提升，而且經過早前亞洲之旅，一班球星包括王牌射手伊巴謙莫域狀態已操起。蘭斯今季換教頭，季初難免要大執，遇上如狼似虎嘅PSG注定冇運行，波童推介讓球客勝。

(TVB 302周六凌晨2時30分直播)
中前場主力狀態已操起

過去一周PSG新聞多多，除咗啱啱爆出拿維斯有淫照外洩，球會昨日亦宣布放棄收購皇馬翼鋒迪馬利亞，不過正如首席球星伊巴謙莫域早前所講，PSG現時猛將如雲，根本唔使迪馬利亞都已經夠殺。PSG今夏放走咗阿歷士洛里高、文尼斯、查列等過氣球員，補入巴西中堅大衞雷斯及科特迪瓦右閘奧里亞兩名守將，令攻守更加平衡。新兵大衞雷斯周中才歸隊，預計上陣機會不大，不過一班中前場主力個個都好弗，除伊巴謙莫域對傑志、甘岡個人入咗5球，小將巴希碧克、安根達都交到功課，盧卡斯洛迪古斯、柏斯托尼、馬高華拉堤全部可以落場搏殺，大有不勝無歸之感！

蘭斯自從12/13年球季升班後，近兩季都能夠成功護級，不過一手帶領球隊升上甲組嘅教練科尼亞已被里昂撬走，搵咗上季執教法乙格迪爾嘅維素安頂上，整體感覺明顯「降呢」，況且聯賽次席射手阿耶迪及防線主力基祖華克亦已離隊，陣容或者要再執，季初唔好對佢哋太高期望。