巴斯蒂亞撼馬賽 新帥交鋒唔敢對攻

猪拉多纳

今晚法甲將會上演一場新帥交鋒戲碼，馬基列尼領軍嘅巴斯蒂亞主場惡鬥由比爾沙執教鞭嘅馬賽。話就話新官上任三把火，不過主隊流失唔少鋒將，就算想發火都有心冇力，客軍今季重組鋒線亦適應需時。既然兩邊火力都靠唔住，1.6倍入球細諗得過。

（tvb302、now714台周日凌晨3:00直播）
巴斯蒂亞主力前鋒走晒

巴斯蒂亞一向唔係咩名氣球隊，之不過佢哋今季教頭馬基列尼就夠晒名堂。呢位前法國中場以掃蕩力強、活力十足聞名，雖然未教過頂級聯賽球隊，但以佢嘅經驗想執靚隊波嘅防守真係話都冇咁易。更何況巴斯蒂亞前鋒基安尼般奴、卡斯里同拉斯賓天奴齊齊離隊，想主攻都難，不如把心一橫死守博偷雞好過。

馬賽今季由新帥「狂人」比爾沙執教，雖然呢位阿根廷教練以喪攻見稱，但係馬賽先後賣走前鋒佐敦阿休、中場華布拿，力圖打造新鋒線。就算佢哋補入擅長後上搵食嘅中場阿歷辛迪尼，點都要啲時間適應新戰術，邊有咁快發揮到威力。更何況聯賽首戰雙方都唔想失威，穩打穩紮，入波仲點會多。