慕遜雄心壯志做贏「加」

猪拉多纳

積極增兵玩雙翼齊飛

上季幾經辛苦拎到歐洲賽資格嘅慕遜加柏，今晚喺德甲主場迎戰史特加，阿占好欣賞佢哋嘅主場喪攻踢法，係，雖然上季嘅「進攻鐵三角」隨住艾蘭高離隊拆夥，但慕遜新季改玩雙翼齊飛依然好有睇頭，反而史特加季前轉會冇乜驚喜，睇怕今季又要為護級打拼，今場一於博3.1倍「讓球主勝」啦！

（有線61、64、201及203、廣東體育周日晚11:30直播）

隨住効力咗5年嘅球會英雄艾蘭高離隊，慕遜加柏季前改玩雙翼側擊，羅致咗超新星安達夏恩同史特加翼鋒伊巴謙查奧爾，後者今仗聯賽首演仲即刻倒戈，戰意唔使懷疑，有呢兩隻強翼做供應，上季入波當食生菜嘅麥斯古斯唔憂無士哥入啦！咪忘記佢哋件年輕中場基拉馬經過世盃洗禮後，變得更加成熟，莫講話第1擊開W吖，阿占仲認為慕遜可以左右今季德甲大局添！
4件主將走人 史特加衰過上季

史特加季前除咗放走伊巴謙查奧爾，守將波卡、中場蘭尼基迪拉同前鋒卡卡奧都相繼走人，戰鬥力大打折扣！最弊係史特加上季已經唔係踢得好，只係排尾四僅僅護級成功，早前喺德國盃又慘吞波琴兩蛋提早出局，以史特加依家嘅實力作客慕遜加柏，真係好難搶到分囉，分分鐘大敗都唔奇添！

頂占筍盤：慕遜加柏（讓球主勝）