曼城顯冠軍級數 利記人多手腳亂

猪拉多纳

周一晚英超特別場上演兩強相遇，曼城主場大戰利物浦，前者首周能作客擊敗東北惡爺紐卡素，已展示出佢哋冠軍級數，主帥比歷連尼重用高大兼把握力強嘅迪斯高打正選箭頭，呢位波斯尼亞射手上季攻入26球，足見比帥比起將迪斯哥冷落嘅前任文仙尼更加聰明，加上陣中仲有耶耶托尼、捷西斯拿華斯、阿古路、祖維迪及傷愈中場大衞施華咁多板斧，難怪「藍月亮」信心十足。
點用巴神考羅帥功力

反觀利物浦高價賣走蘇亞雷斯，換番包括巴洛迪利在內8至9名球員，今季又要踢埋歐聯多線作戰，對板櫈深度及大量傷兵湧現時會有所幫助。巴洛迪斯好快會宣布加盟，作為一名出色領隊，係不能逃避問題球員，巴神天賦毋須懷疑，有身形能突破，但能否將佢全面發揮兼唔出醜，就要睇吓紅軍主帥羅渣士嘅功力喇！

不過，利物浦一下子有咁多新人加盟，人多手腳亂，個陣有排執，磨合又需時，要佢哋好似上季去到4月仲有爭標機會相當困難。曼城主場一向厲害，眼見曼聯、阿仙奴、車路士等勁敵不斷增兵，今晚又面對利物浦，為咗衞冕，相信可刺激起佢哋對勝利嘅飢渴感，值得睇高半線。
金句：紅軍作客當今曼市一哥唔易過！