開局唔多順馬賽難讓尼斯

猪拉多纳

今日受注賽事以二線波為主，不過阿King將重心放喺法甲獨腳戲馬賽主場迎戰尼斯。馬賽雖有名帥比爾沙高調接手，但開局唔順令佢備受壓力，仲傳出將帥不和消息，內憂外患下讓唔起尼斯，轉捧讓球客勝。

（TVB 302周六凌晨2時30分直播）
鐵腕比爾沙搞躁球員

比爾沙出晒名脾氣火爆，呢位阿根廷籍教頭志切改造球隊，可惜開咧三仗勝和負各一，難免令佢心情唔靚，早前當地傳媒大爆佢同今季從西布朗回收番嚟嘅中場艾馬菲達奴，喺訓練期間吵大鑊，要勞動其他工作人員將佢哋分開，之後更話艾馬菲達奴想返英超，況且眾將又未適應到比帥嘅新戰術，依家內部士氣認真麻麻。

尼斯上仗慘遭波爾多反勝，主力射手施維坦歷因傷上陣成疑，在攻力受削之下，相信今仗穩陣行先唔敢冒進，加上佢哋近三次作客馬賽未輸過，有得受讓值得捧場。

至於法乙勒哈弗爾主場對格迪爾，勒軍拿比漢和格迪爾前鋒比基安尼、中場列沙治今季聯賽都各入3球，呢場入波唔會少，大盤好路。最後瑞典超希爾星堡主場硬撼咸史達斯，希堡火力全開唔係人咁品，咸史達斯近三次作客希堡均輸波而回，梗係揀主勝喇。