華倫馬拉加殘陣捱「細」界

猪拉多纳

雖然話西甲競爭激烈，但勢估唔到首輪聯賽即有4隊波有人被逐。今晚就由其中2支球隊對碰，華倫西亞喺主場恭候馬拉加。華倫鋒線乏力欠強攻本錢，馬拉加則陣容不整求穩守，咁嘅情況，2倍入球細有得諗。

（開賽時間：周六凌晨4:00）

華倫上仗有中場迪保羅領紅，好在守將盧卡斯奧班建功，先唔使全失3分。之不過一眾鋒將唔記得帶射門鞋，成場波夾埋射咗10腳，但竟然冇球中目標，表現認真唔掂。更大鑊係射手洛迪高摩連奴日前因傷缺席操練，相信今晚上陣機會唔大，前線焗用小將柏高艾卡沙掛帥，但如果佢有貨交，上場就唔使畀人換走啦，前線啞火，未必咁易攻破對手大門喎。

馬拉加上仗贏畢爾包1:0打響頭炮，但實情成場波都畀對手控制大局，如非比賽末段球證誤判，馬拉加邊保得住勝局呀？中場杜達、左閘安頓尼斯喺比賽尾段更加亂晒龍，結果齊齊領紅今場停賽，陣容不整，新帥加西亞自然唔敢亂嚟，隨時泊定大巴守到完場。