祖記割「禾」響頭炮

猪拉多纳

意甲今晚拉開戰幔，揭幕戰由基爾禾迎戰衞冕嘅祖雲達斯。帶領祖記完成聯賽3連霸偉業嘅干地，今夏功成身退，並改由阿里基接手，後者為咗取悅新米飯班主，聯賽頭炮梗係要做得好好睇睇，一於捧2.3倍「讓客」。

（TVB301周日凌晨0:00直播）

祖記季前放走加利亞雷拉同胡仙歷兩名老將，再引入新星艾華路莫拉達，雖然後者膝傷今晚唔使預，但前線仲有泰維斯同洛蘭迪拍住上，搵食話咁易。

至於基爾禾季前備戰甩晒轆，8月幾場熱身賽全敗，日前喺意盃更被乙組仔佩斯卡拉踢埋出局，狀態咁曳點信呀。而且佢哋係上季非降班球隊中火力最弱嗰隊，今夏淨係執件三張嘢嘅麥斯盧比斯就算數，咁搞法破唔破到蛋都成問題。