紅軍開火射爆腳軟熱刺

猪拉多纳

腦殘 拉爾拉拿登場

蘇亞雷斯離開英超轉戰西甲，但利物浦就引入同樣麻煩難搞嘅巴洛迪利，新季繼續靠癲佬孭飛！起飛腳、除衫騷肌、單刀散步、怒打隊友、倒轉背心、擅闖監獄、闖校如廁等乜都齊，要數「腦殘」嘅「爆」事真係多到數唔晒，相信今季睇英超除咗有好波睇之外，仲會有好多「爆」嘢睇！利物浦今晚造訪白鹿徑，對住「欺善怕惡」嘅熱刺，上場佢哋輸畀曼城1:3，今仗有傷愈復出嘅拉爾拉拿同巴洛迪利為「紅軍」作處子戰，肯定搏盡證身價，一於棒2.44倍利物浦W。

巴洛迪利加盟利物浦後睇落洗心革面，球隊訓練完之後，其他隊友走晒去休息，唯獨呢位意大利國腳一個加操，睇嚟真係想為「紅軍」首演做足準備喎！雖然「腦殘」麻煩多多，但成班手足好似隊長謝拉特同佐敦軒達臣等，都話好想盡快同佢合作，陣營士氣似乎唔錯。
巴洛迪利有火加操

至於另一位生力軍拉爾拉拿，亦已經傷愈可以候命，呢位中場好波之餘又有創造力，有佢夥拍巴洛迪利、史達寧同史杜列治衝鋒陷陣，利物浦中前場可謂火力十足。
熱刺對強隊冇晒影

熱刺上季主場對親實力分子例牌腳仔軟，絕對「欺善怕惡」，試過輸畀曼城、利物浦同車路士，當中仲曾經狂吞「紅軍」5隻光蛋，睇嚟主場出擊唔係秤先好多咋喎！冇錯，熱刺自從由新帥普捷天奴掌舵後表現好咗，頭兩輪英超都贏波拎足6分，但查實兩仗對手都只係弱旅，唔足以反映熱刺嘅真正狀態，今晚面對「紅軍」將會見真章，Yennie梗係捧人腳秤先嘅利物浦啦！
Data King：利記2014英超未曾連敗

‧史杜列治近8場聯賽只得2球進帳。

‧利物浦自2014年開始未嘗聯賽2連敗。

‧計埋上賽季，熱刺近6場聯賽5勝1負。
乜都玩錦囊：熱刺翻生玩「大」佢

熱刺喺普捷天奴執教下，踢法明顯比上季更具侵略性，當中靚仔鋒將拉美拿重生更加係主要原因，齋睇呢支倫敦隊伍新季4戰勁入10球就知咩料。撞正有巴洛迪利夥拍史杜列治合組箭頭嘅「紅軍」，1.62倍大梗要兼顧。