巴拉福特食得「咸」魚抵佢贏

猪拉多纳

英格蘭聯賽錦標今晚展開第1圈賽事，奧咸主場迎戰同屬英甲嘅巴拉福特。主隊季初表現唔得穩陣，反而有心爭盃仔嘅客軍仲可靠，平手盤一於撐2.05倍嘅巴拉福特。

（開賽時間：周三凌晨2:30）

奧咸開季甩腳，成隊波要去到上場聯賽作客唐卡士打先開到齋，中止球隊5戰不勝尷尬劣績。雖然射手科迪夾埋攻入4粒交足功課，之但係拍擋賴斯端拿打柴，另一前鋒哥羅斯又同球會解咗約，前線人選捉襟見肘，唔通場場都要科迪一個自己打晒咩。

相反巴拉福特發揮穩定，作客更取得3勝1和不敗佳績，最重要係球隊今季有心爭盃仔。佢哋早前就喺英聯盃第2圈越級殺敗列斯聯打入第3圈，相比起喺第1圈出局嘅奧咸，鬥心明顯大好多。雖然前鋒比利加勒休戰，但以占士漢臣為首嘅鋒線亦已攻入5球，火力依然靠得住，可以秤先。