紐約 肯薩斯射手大鬥法

猪拉多纳

美職神射手大鬥法！紐約紅牛聽朝喺主場大戰肯薩斯體育會，前者要爭取季後賽入場券，後者要追擊東岸一哥華盛頓聯隊，鬥心十足！再者，雙方前鋒喺聯賽射手榜爭餐死，為公為私肯定冇留手，1.76倍入球大唔追唔得。

（TVB301周日早上7:30直播）

紅牛射手巴利胡禮菲臘斯喺英格蘭撈唔掂，但自從過咗美職後即刻風生水起，佢依家唔止以20球「士哥」排喺射手榜榜首，仲成為紅牛史上首位一季射入20球嘅球員，認真巴閉。咪以為呢位前鋒就會心足，因為仲有個紀錄等緊佢去破，話說美職單季個人入球紀錄係27球，只要巴利胡禮菲臘斯喺剩低9場波入面射入8球就可以刷新紀錄，何況佢仲要幫球隊殺入季後賽，點到佢唔搏先。

對手肯薩斯近況回落，但今場勝在有射入17球、排喺射手榜次席嘅前鋒當姆戴亞同主力中場費爾夏柏刑滿復出，火力即以幾何級數提升。佢哋為免畀東岸一哥華盛頓愈拋愈遠，聽朝仲唔趁住當姆戴亞復出同對手駁火搶分咩！